|
免負責聲明 ‧ 參考工具:臺灣閩南語常用詞辭典 ‧ 臺文/華文線頂辭典 ‧ 信望愛《臺語工具》 |
|
Bián hū-tsik sing-bîng‧ Tsham-khó kang-khū:Tâi-bûn/Huâ-bûn suànn-tíng sû-tián ‧ Tâi-uân Bân-lâm-gí siông-iōng-sû sû-tián ‧ Sìn-bōng-ài《Tâi-gí kang-khū》 |
新文章
黃文雄(N̂g Bûn-hiông;1937年10月2— ),臺灣獨立運動的參與者,1970年美國紐約市424刺蔣案的主角,捌擔任過臺灣人權促進會會長,中華民國國策顧問,專門負責佮人權有關係的議題。
N̂g Bûn-hiông (黃文雄, 1937 nî 10 gue̍h 2—), Tâi-uân to̍k-li̍̍p ūn-tōng ê tsham-ú-tsiá, 1970 nî Bí-kok New York-tshī 424 tshì Tsíunn àn (四二四刺蔣案) ê tsú-kak. Bat tam-jīm kuè Tâi-uân Jîn-khuân Tshiok-tsìn-huē huē-tíunn, Tiong-huâ Bîn-kok kok-tshik kòo-būn, tsuan-bûn hū-tsik kah jîn-khuân ū kuan-hē ê gī-tê.
黃文雄1937年出世佇臺灣新竹西門的林家大厝,外公是林占梅的後代,老爸捌做過新竹水道水水廠的廠長,1950年代,退守臺灣的國民黨,為著安定政治局勢,實行大規模的掃"共匪仔"行動,島內會使講是人人自危,真濟異議人士因為按呢予人掠起來關入監牢,黃文雄的老爸是一个老實的公務人員,嘛因為這款的白色恐怖煞變做犯人入監。
N̂g Bûn-hiông 1937 nî tshut-sì tī Tâi-uân Sin-tik Se-mn̂g ê Lîm--ka tuā-tshù, guā-kong sī Lîm Tsiam-buê (林占梅) ê hiō-tāi, lāu-pē bat tsò-kuè Sin-tik tsuí-tō-tsuí tsuí-tshíunn ê tshíunn-tíunn. 1950 nî-tāi, thè-síu Tâi-uân ê Kok-bîn-tóng, uī-tio̍h an-tīng tsìng-tī kio̍k-sè, si̍t-hîng tuā kui-bôo ê sàu "kiōng-huí-á" hîng-tōng, tó-lāi ē-sái kóng sī jîn-jîn tsū-guî, tsin-tsē ī-gī jîn-sū in-uī án-ne hōo lâng lia̍h--khí-lâi kuainn ji̍p kann-lô. N̂g Bûn-hiông ê lāu-pé sī tsi̍t-ê láu-si̍t ê kong-bū-jîn-uân, mā in-uī tsit-khuán ê pe̍h-sik khióng-pòo suah piàn-tsò huān-lâng ji̍p-kann.
黃文雄佇新竹中學畢業了後,考牢國立政治大學新聞系,後來佇媽祖離島東犬島(東莒)做兵,退伍了佇1963年捌讀一冬政治大學的新聞研究所,伊佇1964年得著美國匹茲堡大學(University of Pittsburgh)的獎學金,到遐讀社會學研究所,1966年轉去康乃爾大學(Cornell University)社會學博士班,佇彼時的反戰運動佮學生運動中攏真活顯。
N̂g Bûn-hiông tī Sin-tik Tiong-o̍h pi̍t-gia̍p liáu-āu, khó tiâu Kok-li̍p Tsìng-tī Tāi-ha̍k sin-bûn-hē, āu--lâi tī Má-tsóo lî-tó 東犬島 (東莒) tsò-ping, thè-ngóo liáu tī 1963 nî bat tha̍k 1-tang Tsìng-tī Tāi-ha̍k ê sin-bûn gián-kìu-sóo. I tī 1964 nî tit-tio̍h Bí-kok Phit-tsu-pó Tāi-ha̍k(University of Pittsburgh) ê tsíunn-ha̍k-kim, kàu hia tha̍k siā-huē-ha̍k gián-kìu-sóo. 1966 nî tsuán khì Khong-nái-ní Tāi-ha̍k((Cornell University) siā-huē-ha̍k phok-sū-pan, tī hit-sî ê huán-tsiàn ūn-tōng kap ha̍k-sing ūn-tōng tiong lóng tsin ua̍h-hiánn.
- 這篇文章是對河佬百科(Holopedia)的:"N̂g Bûn-hiông (chèng-tī-ka)"改來的,原本文章的作者請看伊的編輯歷史。