邏則 (logic)會得講是咧研究論證(argument)，雖罔哲學家對伊的定義猶有爭論，總是邏則家欲做的工課就是提供濟濟有效佮空譀的推論 (inference)，予人會得區別論證的好䆀。
Lô-tsik (logic) ē-tit kóng sī leh gián-kìu lūn-tsìng (argument). Sui-bóng tiat-ha̍k-ka tuì i ê tīng-gī iáu ū tsing-lūn, tsóng--sī lô-tsik-ka beh tsò ê khang-khuè tō sī thê-kiong tsē tsē ū-hāu kap khang-hàm ê tshui-lūn (inference), hōo lâng ē-tit khu-pia̍t lūn-tsìng ê hó-bái.
往過邏則攏hông當做哲學的一支分支咧研究，1850年彼站仔起，數學嘛開始較注文邏則，到甲現此時，電腦科學閣較著倚靠邏則，邏則是一種形式科學 (formal science)，邏則著研究陳述(statement)佮論證，閣著共怹分類，邏則上基層的工課就是研究推論的形式系統(formal system)佮自然語言的論證，邏則研究的範圍真闊，對謬論 (fallacy)、誖論 (paradox)，到甲機率(probability)推理、因果律 (causality)的論證...攏是。
Íng-kuè lô-tsik lóng hông tòng-tsò tiat-ha̍k ê tsi̍t ki hun-ki leh gián-kìu, it pat ngóo khòng nî hit tsām-á khí, sòo-ha̍k mā khai-sí khah tsùn-būn lô-tsik, kàu kah hiān-tshú-sî, tiān-náu kho-ha̍k koh khah tio̍h uá-khò lô-tsik. Lô-tsik sī tsi̍t tsióng hîng-sik kho-ha̍k (formal science), lô-tsik tio̍h gián-kìu tîn-su̍t (statement) kap lūn-tsìng, koh tio̍h kā in hun-luī. Lô-tsik siōng ki-tsân ê khang-khuè tō sī gián-kìu tshui-lūn ê hîng-sik hē-thóng (formal system) kap tsū-jiân gí-giân ê lūn-tsìng. Lô-tsik gián-kìu ê huān-uî tsin khuah, uì bīu-lūn (fallacy), puē-lūn (paradox), kàu kah ki-lu̍t (probability) tshui-lí, in-kó-lu̍t (causality) ê lūn-tsìng, ... lóng sī.
邏則佇古典希臘語寫做 λόγος，表示語詞(the word)、言語，尾仔變成思考(thought)、推理(reason)的意思。
Lô-tsik tī kóo-tián Hi-lia̍p-gí siá tsò λόγος, piáu-sī gí-sû (the word), giân-gí, bué--á pìnn-tsiânn su-khó (thooght), tshui-lí (reason) ê ì-sù.