认识论是哲学的一个分支，嘛有人讲做智识论，认识论所研究的主题是真理佮智识的性质、原头和界限（人会当了解的界限等等）。
Jīn-sik-lūn sī tiat-ha̍k ê tsi̍t-ê hun-ki, mā ū lâng kóng-tsò tì-sik-lūn. Jīn-sik-lūn sóo gián-kìu ê tsú-tê, sī tsin-lí kap tì-sik ê sìng-tsit, guân-thâu hām kài-hān (lâng ē-tàng liáu-kái ê kài-hān tíng-tíng)
伫一个领域的讨论，一直拢致心伫咧分析智识的本质佮智识和一寡相倚的观念（比论讲真理、信笃）中间的关系，有真济讨论佮证成（英语：justification, theory of justification）有底带，认识论学者会去分析逐项智识主张后壁证成的标准，也就是主张的人伊著有甚物根据才会用得讲伊知影某一项事实，一来二去，认识论所问的是亲像遮的问题： "你敢有影知影你量讲你知影的代志？"佮"你是按怎知影你知影的代志的？"
Tī tsit-ê líng-hi̍k ê thó-lūn, it-ti̍t lóng tì-sim tī leh hun-sik tì-sik ê pún-tsit kap tì-sik hām tsi̍t-kuá sio-uá ê kuan-liām (pí-lūn-kóng tsin-lí, sìn-táu) tiong-kan ê kuan-hē. Ū tsin tsē thó-lūn kap tsìng-sîng (Ing-gí: justification, theory of justification) ū tī-tāi. Jīn-sik-lūn ha̍k-tsiá ē khì hun-sik ta̍k-hāng tì-sik tsú-tiunn āu-piah tsìng-sîng ê piau-tsún, ia̍h-tsīu-sī tsú-tiunn ê lâng i tio̍h ū sím-mi̍h kin-kì tsiah ē-īng-tit kóng i tsai-iánn bóo-tsi̍t-hāng sū-si̍t. It-lâi-jī-khì, jīn-sik-lūn sóo mn̄g--ê sī tshin-tshīunn tsiah-ê būn-tê: "lí kám ū-iánn tsai-iánn lí liōng-kóng lí tsai-iánn ê tāi-tsì?" kap "lí sī án-tsuánn tsai-iánn lí tsai-iánn ê tāi-tsì--ê?"
欲研究智识的理论，穷实是有诚济无仝的步数的，这站仔有一寡新的研究已经共几若世纪的旧假定捒倒，嘛因为按呢，认识论到今犹原是真活动的学科。
Beh gián-kìu tì-sik ê lí-lūn, khîng-si̍t sī ū tsiânn tsē bô-kâng ê pōo-sòo--ê, tsit-tsām-á ū tsi̍t-kuá sin ê gián-kìu í-king kā kuí-ā sè-kí ê kū ká-tīng sak-tó, mā in-uī án-ne, jīn-sik-lūn kah tann îu-guân sī tsin ua̍h-tāng ê ha̍k-kho.
下跤是认识论定定处理的问题：
- 咱人是按怎确实知影一项代志/物件的？
- 咱人对代志/物件有佗一寡重耽的思考方式？
- 敢有彼款会当确定思考方式是著或者是毋著的方法？
- 这世间敢有不可知的领域伫咧？若准有，是用啥款形体存在的？
Ē-kha sī jīn-sik-lūn tiānn-tiānn tshú-lí ê būn-tê:
- Lán lâng sī án-tsuánn khak-si̍t tsai-iánn tsi̍t-hāng tāi-tsì/mi̍h-kiānn--ê?
- Lán lâng tuì tāi-tsì/mi̍h-kiānn ū toh-tsi̍t-kuá tîng-tânn ê su-khó hong-sik?
- Kám ū hit-khuán ē-tàng khak-tīng su-khó hong-sik sī tio̍h hi̍k-tsiá-sī m̄-tio̍h ê hong-huat?
- Tsit sè-kan kám ū put-khó-ti ê líng-hi̍k tī-leh? Nā tsún ū, sī īng siánn-khuán hîng-thé tsûn-tsāi--ê?
- 这篇文章是对河佬百科(Holopedia)的："Jīn-sek-lūn"改来的，原本文章的作者请看伊的编辑历史。