正義（tsìng-gī）是人和牽涉的代誌佮物件攏佇一種理想、閣道德上正確的狀態，這個理想自來毋捌實現-過，這世間，四界齊是無平正的代誌，雖罔按呢，大部份的人攏認為咱著佮無正義對敵閣打整-伊，世界上濟濟社會和政治運動oan-nā佮爭較正義有底代。
毋過，到底正義佮無正義的現實，對咱有啥物要求，咱著做啥物才著-咧，這項代誌，咱人猶無蓋清楚，現此時人類煞踮佇一款礙虐的地位，差不多人攏掠正義不止仔重要，總-是無確定佇咱本身的角色、機構、行放抑整個世界來講，欲按怎判斷啥物是正義、啥物閣無正義。
這個問題久長以來就是哲學討論的內容，親像講，正義究真是啥物，閣要求咱著按怎做？這兩個問題通講是從古早佮今就上捷hông討論-的，比論講，佇一個社會內底，著按怎共財利做分伻？是予隨人攏平濟？抑是予gâu人來決定？或者是照隨人的地位來分？這個問題佇過去2,500年直直討論佮誠激膠，哲學家、政治學者、神學家、法律學者和濟濟人攏想欲共正義的原頭、本質佮要求等等拆明。
咱會當共正義看做一種德行，若共當做人的性質來講，正義干焦通佇怹的行放佮怹做成的慣習來表現；咱嘛會用得共正義看做行放抑慣習的性質，若按呢，就干焦佇人有這號行放或是行彼號慣習的時才會當表現，正義的原頭隨人想-的攏各樣，檢采是和諧、神的命令、自然的規則、抑是人所創造-的，閣嘛有可能是別項加真基本，毋過四常人感覺無遐重要的倫理標準。
正義的要求主要有兩方面：分伻佮打整，分伻的正義檢采是要求平等，予人怹應該得-著的，予上蓋宋兇-的得著上大的利益，保護透過逐項著的手路提著的財利，或者是共規個利益最大化，打整的正義包括要求對往過的行放報復，抑是因為未來的後果來罰罪。
正義的理想著透過機構才會當實現，遮的機構著處理正當性、程序、法律的制定佮解說的工課。
- 這篇文章是對閩南語維基百科的："Chèng-gī"改來的，原本文章的作者請看伊的編輯歷史。